قصيييييدة روووووعة

بسم الله الرحمن الرحيم
هذه القصيد ة قراتها فاعجبت بها كثيرا فهي على لسان مغترب ذاق مرار الغربة واعتصره المها فهو يخاطبها ويصفها بانها الوهم واخداع فهي قصيدة رائعة في ثوب ظريييف جدا
ارجووا ان تستمتعوا بها
وتققبلو تحياتي
ابو العباس

وهم الغربة

يا غربة يا بكاية يا غشاشة يا مستهبلة
تغرينا بي درهم قروش ووراه قنطار بهدلة
جيناك لي سنتين وبس او قول تلاتة نكملها
نلقي المراد ونودعك نرجع حياتنا نبدلها
نبني البيوت في العاصمة وبي كوم اثاث بنجملها
وكرونا حارة نحضرها اصلو التنقل مشكلة
ونكمل الدين بي مهل والسمحة جاهزة نحصلها
غير القروش اللي الاهل عبرالشهور حنرسلها
والباقي يدخل في البنوك ونشوف دبارة نشقلها
ناس فكرت تجي العلم تبدا الدراسة تواصلها
احلام كتيرة وشيقة وامال كبيرة ناملها
لكن حساباتنا الغلط في كل عام بنرحلها
مرت سنين من العمر بنعزها وبنفضلها
والحسبة وصلت تاشرات يمكن نعيش ونبدلها
وتعال نحاسبك ياوهم من غير رقم او امثلة
كان للقروش نجري ونحوش لكن تقول بنشاكلها
ما راضية تقعد في الجيوب تقول حرامي بينشلها
لكن بترقد في الضهور بي ديون تقيلة مطولة
ممحوقة ما بتقضي القرض واقل حاجة تكملها
كملانة بطحاء وحق وزن ومجاملات مستفحلة
وضرائب ابعاج ندفعها والزامي حمدي نحولها
واحلامنا صبحت زي سراب نمشي ونجر ما نحصلها
ياريت يكون هم القروش يا غربة فيك هو المعضلة
لكن تعال شوف الهموم المافتكرنا نقابلها
ذلة ومهانة واحتقار خلو النفوس متململة
سجنآ كبير فيه الكفيل سجان قيوده مكبلة
اشغاله شاقة ومؤلمة ودايمآ تكون مستعجلة
ما عاد يكفيها النهار تحتاج ليالي مليلة
امراض كتير بدت معاك قبل الالم تستثقلها
ناس الضغط والسكري وفوق القلب وجع الكلي
مصران وقرحة واكتئاب ونفسنا ما متحملة
وبقينا فيك كيمان لحم تحت الهدوم متندلة
واكيد يكون اكل العلب واكل المجمد عاملها
عدم الرياضة مع المشي لابد يكون ليهم صلة
وكمان تعال لمعادلة ما قدرنا اصله نعادلها
سجن العيال جوه الشقق ؟ ولا الفراق للعائلة ؟
في كل طرف تلقي القرف تلقي الخيوط متداخلة
جيب العيال بي جيبنا مال وجيوبنا غيره مميلة
وصغارنا صبحت بالزهج متوحشة ومتجفلة
لا قادرة تلعب في خلا لا ضل شديرة يضللها
لا قادرة تدرس بي نفس من الدروس المذهلة
تلقي الولد غالبو الكلام والبت كبيرة مريلة
كل الضغوط جاتهم سوا وماقدرنا حتي نقللها
اما الفراق اصل الوجع ومشاكله بايتة مقيلة
كل زول مفارق عارفها وما اظن في داعي افصلها
يا غربة اديناك كتير ادينا خاطرك يسهلها
خلينا نرجع بالفضل نلحق حياتنا نعدلها
امالنا فيك بدري اتنست الا الرجول متوحلة
وبقينا زي اهل القبور لا البره عارف الداخلها
لا الجوة برجع لي ورا يحكي الحقيقة يوصلها
لكن خلاص هان الخلاص عدك نزل مهما علا
وانشاءالله نحيا نودعك وتكوني ذكري نغازلها
ياغربة يابكاية يا غشاشة يا مستهبلة

والله الكلام دد كلو صح

مشكوووووووووووووووووووووووووووووووووووووووووور على القصيدة الروعة وتقبل مروري

afro

مشكــــــــــــــــــــــــــــــــــــــــــــــــــــــور

تسلم على القصيده الحلوه

afro

شكرا لي مروركم حبايبي الاخ جدو والاخ البوس ابوحميد
تقبلو تحياتي ابو العباس
Very Happy